Bu ali mükafata britaniyalı yazıçı Doris Lessinq layiq görülüb. Mükafatın mümkün laureatları sırasında amerikalı yazıçı Filip Rot, yapon Xaruki Murakami və italyan yazıçı Klaudio Maqrisin adları çəkilsə də, Nobel mükafatı Doris Lessinqə nəsib olub. Qeyd edək ki, ədəbiyyat üzrə Nobel mükafatı 80 dəfə Avropa, 11 dəfə Şimali Amerika, 5 dəfə Asiya, 4 dəfə Afrika, 3 dəfə Latın Amerikası, 1 dəfə Avstraliya qitəsinin təmsilçisinə nəsib olub. Mükafatı almış 104 laureatdan yalnız 11 nəfəri qadındır. Onlardan 24 nəfəri əsərlərini ingilis, 11 nəfəri fransız, 10 nəfəri alman, 6 nəfəri İsveç, 5 nəfəri rus, qalanları başqa dillərdə yaradıblar. Doris Lessinq 1919-cu ildə İranın Kirmanşah şəhərində anadan olub. Altı yaşında ikən gələcək yazıçının ailəsi Zimbabveyə köçüb və Afrika həyatı onun yaradıcılığına mühüm təsir göstərib. 1949-cu ildə Londona köçən yazıçı ədəbi fəaliyyətə məhz bu şəhərdə başlayıb. Onun “Ot oxuyur” adlı ilk əsəri 1950-ci ildə işıq üzü görüb. Doris Lessinqə şöhrət gətirən əsərlər “Zorakılıqdan doğan uşaqlar” seriyasından dərc olunan “Marta Kvest”, “Münasib nikah”, “Tufandan sonrakı ləpə”, “Quru ilə əhatə olunmuş”, “Dörd qapılı şəhər” romanlarıdır. Tənqidçilər yazıçının “Qızıl gündəlik” əsərinin şedevr hesab etsələr də, yazıçı bu əsərin feminist ədəbiyyata aid edilməsi ilə razılaşmır. Qeyd edək ki, Doris Lessinq 1995-ci ildə Harvard Universitetində doktorluq dərəcəsi alıb və 4 il sonra onun adı son minillikdə Şərəf Kavalerləri Ordeninə layiq görülmüş şəxslərin siyahısına daxil edilib. "Göy üzü daş saxlamaz" İranda cap olunub Şair Ramiz Rövşənin "Göy üzü daş saxlamaz" kitabı İranda Azərbaycan dilində nəşr olunan "Yaşmaq" ədəbi-bədii jurnalının təşəbbüsü ilə çap edilib. Kitabın redaktoru Səid Muğanlının APA-ya verdiyi məlumata görə, Azərbaycan dilində, lakin ərəb qrafikası ilə çap olunan kitabın rəssamı Ərdəkir Rüstəmdir. İki min nüsxə tirajla nəşr edilən kitab geniş oxucu kütləsi üçün nəzərdə tutulub. S.Muğanlı bildirib ki, İranda Azərbaycanın müasir şair və yazıçılarının əsərlərinə böyük maraq göstərildiyindən bu səpkili nəşrlərin çapı davamlı şəkil alacaq.